Songtexte von Stefan Meier - HaddockDu nach Oschte Und ich nach Weschte Du muesch kei Angscht ha ... Du seisch, das isch nöd recht Aber d Wält, die dreiht sich gliich Und de Nabel,

Golfstrom

Songtexte von Stefan Meier

01 Ach & Krach

02 Alles graduus

03 Azelle Bölle schelle

04 Bahnhofbüffet

05 Bisch min Stern

06 Chopfsalat

07 Dänksch no a mich?

08 De Tüüfel isch los

09 Doofmaa

10 En Millimeter Muet

11 Es hät für mich

12 Filmriif

13 Gang zrugg

14 Gartezwerg

15 Gody

16 Golfstrom

17 Im Chreis

18 Lah sie gah

19 Last Minute

20 Mängmal

21 Muess emal gseit sii

22 Mystery Woman

23 Narreschiff

24 Novämerbahnhof

25 Nur no eimal

26 Offside im Schilf

27 Oh Blues

28 Ojemine

29 Pendler-Blues

30 Quinn de Eskimo

31 Rocksong

32 Schaafhalter-Value

33 Schiff ahoi

34 Scho alles gsii?

35 Schwöschter vom Mond

36 S Füür im Herz

37 Truurigi Strass

38 Uf em Wäg zu dir

39 Upside Down

40 Volksguet

41 Warum no singe?

42 Wo gahsch hii?

1

Ach & Krach

Hoch und heilig, häsch mer gseit

Söll euisi Liebe sii

Hoch und heilig, häsch mer gseit

Söll euisi Liebe sii

Nei danke, null Chance

So nöd

Mit Ach und Krach, mal süess, mal suur

So wott-i dich

Hey, lass di mal falle

Lass endlich los

Hey, lass di mal falle

Dänn fang-i di uuf

Nur so und nöd andersch

Nur so und nöd andersch

Mit Ach und Krach, mal süess, mal suur

So wott-i dich

2

Alles graduus

Es isch alles abgriffe

Dänn mer händ euis

Sid eh und je

Und ein Tag meh

Chomm jetzt stömmer

Rugge a Rugge

Und laufed graduus

Eifach vonenand weg

Graduus isch besser

Als immer im Chreis

Graduus isch besser

Als immer im Chreis

Mer werfed euis

Statt tüüfi Blick

Nur no Sand

Sand i-d Auge

Drum zieh-mer jetzt los

Du nach Oschte

Und ich nach Weschte

Du muesch kei Angscht ha

Dänn wänn mer-s dureziehnd

Sind mer irgendwänn

Wieder Face to Face

Ein Tag vor em Niemeh

Das isch früeh gnueg

Mer laufed graduus

Bis de Oschte

Zum Weschte wird

Und umgekehrt

Hey du, graduus isch besser

Fadegrad verschtricksch di nöd

Graduus isch besser

Eifach nöd zrugg

Graduus isch besser

Du weisch, das stimmt

Graduus isch besser

Als immer im Chreis

3

Azelle Bölle schelle


D Gabi gaht uf Walliselle

Lauft si über d Schtrass

Git de Porsche Gas


De Boss tuet euis Büetzer zelle

Gaht er wieder hei

Sim-mer nur no zwei

Biff, baff, buff

Und du bisch

Verrate und bschisse

Und für immer duss

Biff, baff, buff

Für immer duss


Häsch ja nur en Flirt welle

Sie laht di nüme gah

Seisch für immer Ja


Gahsch go die Riiche wähle

Dene bisch du gliich

Dänked nur a sich

Biff, baff, buff…


Häsch no schnell go gamble welle

D Chugle macht, was sie wott

Und scho bisch du bankrott


De Pfaff de gaht is Puff

Chunnt er wieder hei

Hätt er weichi Bei

Biff, baff, buff…

4

Bahnhofbüffet

Am Sunntig am Morge am Nüni

Ischs Bahnhofbüffet vill z gross

En truurige Countrysong

Bringt de Bierhahne zum Tropfe

Vor mir staht en Espresso und

Laht mi no meh im Chreis laufe

Oh baby, I’m so blue

I still got the blues for you

Und dusse i de grosse Halle

Warted alli uf ihres Glück

Mer isch nümme ganz da

Und gliich nonig weg

Nümme da – und nonig weg

D Schlagziile vom Blick

Schlönd hüt voll zue

S Chnüü vo de Nation

Grad näbed 30 Tote

Eine trinkt scho es Bier

Er hebt s leer Glas i d Luft

Grüess Gott, du truurige Tag

Frölein, bring mer no mal eis

Und dusse i de grosse Halle…

En junge Maa mit Glatze

Schläckt es Rahmdeckeli ab

Es Plakat verspricht s Paradies

Nume hüt – zum halbe Priis

A de Bar lauft en Film ab

I de Chöpf vo e paar Manne

Die, wo-d Hauptrolle spillt

Gaht dänn hei – natürli ällei

Und dusse i de grosse Halle…

Im Portemonnaie han-i no

Es paar Märkli vom Volg

Die lahn-i uf em Tisch liige

Villicht chann-s öpper bruuche

Und dänn nimm-i no eine oder zwei

One for my baby

And one more for the way

For that long, long, lonesome way

Long, long, lonesome way

Long, long, lonesome way

5

Bisch min Stern

Würdsch du mit mir gah

Sunne und Räge verstah

Uf allne Farbe tanze

Würdsch du mit mir gah

Würdsch du mich küsse

Bis tuusig Ängel singed

Ich nüt meh wott wüsse

Würdsch du mich küsse

Chomm nimm mich in Arm

Und heb mi so fescht

Mis Herz bruucht dich

Du bisch min Stern

Würded mir euis d Hand geh

Zäme e Klippe abespringe

Und dänn e neui Wält gseh

Würded mir euis de Muet geh

Würdsch du mit mir wache

E Nacht lang duremache

Tüüf i mich versinke

Würdsch du mit mir wache

Chomm nimm mich in Arm…

Würdsch en Handstand mache

De Alltag uuslache

Ihn nie i euises Huus lah

Lieber es Füür entfache

Würdsch du mich tröschte

Wänn de Mond i de Nacht

Wieder uf Quäcksilber macht

Würdsch du mich dänn hebe

Chomm nimm mich in Arm…

6

Chopfsalat

Business-Buebe händs im Griff

De Kapitän versänkt sis Schiff

En Erdbeerturte für de Rägewald

D Wiehnacht, die chunnt scho bald

Kannibale ässed Chopfsalat

S Läbe kauft sich Aromat

Ihres Herz isch zuckerfrei

Wurschtredli i de Metzgerei

De Bundesrat chunnt im Tram

En Pudel git es Autogramm

Härdöpfelstock mit Seesicht

E Schneeflocke fallt is Gwicht

S rägnet suuri Gedanke

S Glück choschtet hundert Franke

De Elvis chauft im Volg es Bier

Schön bündle muesch-s Altpapier

Es Ross wird König vo England

En Kopfstand chläbt a de Wand

S Eden wird jetzt abgrisse

Wiiter obe händ-s bschisse

Schweri Chüeh stönd im Räge

De Tüüfel wüscht e Chällerstäge

S Füürwehrdepot fangt a bränne

Berge mached es Wettränne

7

Dänksch no a mich?

Häsch din Traumprinz ächt gfunde

Weisch, de uf em rote Sofa

Bisch ghürate und häsch Chind

Würded mer euis no verstah

Im Hauptbahnhof dänk-i mängisch

Chunnsch grad um de Egge

Ich wünsch mer das und gliich nöd

Was würd-i dänn nur säge

Säg, dänksch immer no a mich

Au wänn-d mi nie meh wottsch gseh

Säg, vermissisch mi mängisch au

Oder bi-der jetzt ganz gliich

Weisch no, nach dere Nacht

S Chübelauto hät euis gweckt

Vill z früeh, wie häm-mer glacht

Wem verzellsch hüt dini Träuim

Eusi E-Mails han-i immer no

Als Backup vo mine Gfühl

Mängisch bin-i druff und draa

Dir eis z schriibe, eifach so

Säg, dänksch immer no a mich…

Letschti han-i bim Uufruume

No es Buech vo dir gfunde

Villicht isch es ja es Pfand

Für öppis, won-i nonig weiss

Hey Sister of Soul, wo bisch

Wiit weg und doch so nöch

Würdsch ächt min Name

Immer no so lieb, so lieb säge

Säg, dänksch immer no a mich…

8

De Tüüfel isch los

Chumm-i geschter i min Schpunte

Han-i det de Tüüfel troffe

Es Steak vom Grill hät er gfrässe

Und dezue en Whisky gsoffe

Liecht betrunke hät er gwunke

Chomm e chli mit mir go fiire

Nei, nei, nei, nei

Mach em Tüüfel nie en Gfalle

Au wenn er wott e Rundi zahle

Er schreit luut in Schpunte use

De Bigboss hät de Chris entlah

Und ob ers glaubed oder nöd

De Job han ich jetzt übernoh

Hey Wirt, gang nomal in Chäller

Und bring es paar Herrgöttli mit

Nei, nei, nei, nei…

Wo er dänn hätt müesse zahle

Seit er, leider bin-i stier

Chasch mer nöd no öppis pumpe

Ich gibs der dänn ganz sicher zrugg

Han jetzt ja überall Kredit

Chomm morn eifach über d Brugg

Nei, nei, nei, nei…

9

Doofmaa

Bisch en Tanzbär und merksch es nöd

Wänn d Musig spillt, machsch de Löli

Häsch vo nüt e Ahnig und zu allem e Meinig

Laufsch devoo und stahsch zu nüt

Hey du, hau endlich ab

De Vorhang isch scho lang zue

Hey du, was machsch no da

Hau ab, und lah mi in Rueh

Laufsch immer mit ere Zigi ume

Hebsch sie wie en Chnoche i de Hand

Chlopfsch hohli Sprüch us vollem Buuch

Stahsch näbed de Schueh und mir im Wäg

Hey du, hau endlich ab…

Tuesch Milch in Kafi, Wasser in Wii

Zeigsch allne, wie doof das bisch

Luegsch lieber e Talkshow als in Spiegel

Wädlisch immer wie en Pudel

Hey du, hau endlich ab…

10

En Millimeter Muet

Wo sie weg isch vo ihm, hät er gnueg gha vo allem

Er hät sin Job künnt und gseit, jetzt isch es so wiit

Jetzt hau i ab und nimm mer e Wohnig in London

In Camden Town, und schriib det nur no Gedicht

Dänn gschribe hät er fürs Läbe gern

Aber gläbt hät er wäge dem nöd besser

In Gedanke isch sin Koffer scho packt gsii

Da hät er i sim Fruscht no en Text gschribe

E Kontaktaazeig für de Tages Aazeiger

Ohni Muet hät er immer am beschte dichted

Nur, muetiger isch er wäge dem nöd worde

Als Rach a de Fraue hät er allne welle absäge

Okay, mit einere hät er sich dänn gliich troffe

Nach ere Stund hät er sich verliebt

Nach de zweite Nacht isch er bliibe

Nach drüü Wuuche isch sie schwanger gsii

Nach vier Mönet händ-s ghürated

Nach föif Jahr isch ihres Hüüsli gschtande

Er hät en Job als Übersetzer aagnoh

Schriibe tuet er nur no im fremde Uuftrag

Und läbe eigentlich au

Alles lauft ab wie es Alphabet

Alles schön de Reihe nah

Alles Buechstabe, chuum Wörter und kei Sätz

Mängisch lisst er sini alte Gedicht

Mängisch dänkt er im Bett a London

Meischtens schlaaft er debii ii

Sie lisst jetzt wieder Kontaktaazeige

Ab und zue bliibt sie a einere hange

Bis jetzt fehlt ere no en Millimeter Muet

11

Es hät für mich

Es hät ja vorig für mich

Es hät für mich

Es hät ja vorig für mich

Es hät für mich

Zerscht chunnt min eigne Buuch

Und dänn chunnt ganz lang nüüt

Ich schöpfe vill für mich

Die andere sind mer gliich

Es hät ja vorig für mich…

Du seisch, das isch nöd recht

Aber d Wält, die dreiht sich gliich

Und de Nabel, de Nabel

De bin doch ich


Und bliibsch emal stah

Ränned all a dir verbii

Es isch ja käne besser

Drum lah mi endlich gah


12

Filmriif

S schiffet grau und s blaast en bissige Wind

D Strasse sind dunkel und blind

Am Kiosk det äne isch en Chrieg uusbroche

Die elände Schlagziile vergissich gschwind

Im Schaufänschter schlaft s Bäbi mit em Teddybär

Die beide sind zäme, wänn s nur so eifach wär

Stellsch de Chrage uuf und stellsch der vor

Segsch so cool wie de Depp und DiCaprio

Weisch ganz genau, wie das gaht

Häsch die Type studiert und ihri Tricks parat

Dänn sind s no es paar Schritt bis zum Kino

Dini Rettig für hüt, bisch weisch wie froh

Fanged a laufe ihr Bilder und nämmed mich mit

Es isch mer gliich wohii – eifach weg vo da

Verzelled mer Geschichte, ich glaube ja draa

Nämmed mich mit – es isch mer gliich wohii

Jedes Läbe isch e nonstop Movie-Show

Drum lueg, dass au du en Star bisch

Emal de Winnetou und dänn wieder en Filou

No besser, wänn din Film e Lovestory isch

Mit eme Happy End, das isch klar

Jede isch im e Film und jede isch en Star

Fanged a laufe ihr Bilder und nämmed mich mit…

Everybody's a dreamer and everybody's a star

And everybody's in movies, it doesn't matter who you are

There are stars in every city

In every house and on every street

And if you walk down Hollywood Boulevard

Their names are written in concrete

Fanged a laufe ihr Bilder und nämmed mich mit…

Wänn dänn wieder uf de Strass stahsch

Bisch nüme de gliich, wo-d vorher gsii bisch

Und für en Momänt weisch ganz genau

Dass alles, eifach alles, möglich isch

13

Gang zrugg

De Stöff hätt gmeint, er wüssi alles besser

Und mir segäd alli blöd

Drum isch er dänn Politiker worde

Wie tuet das sim Ego guet

Gang zrugg, gang zurgg

Gang zrugg, dethii, wo-d her cho bisch

Gang zrugg, gang zurgg

Gang zrugg, dethii, wo-d her cho bisch

Gang zrugg Stöff

Em Dani händ-s immer d Spillsache weggnoh

Das macht em hüt no weh

Er verdient jetzt 50 Millione

Tuusig mal meh als du

Gang zrugg, gang zrugg…

Gönd doch zrugg

Mer bruched eui nöd

Sind au ohni eui glücklich

Eui Ziit isch verbii

Gönd doch hei

Get back, get back

Get back to where you once belonged

Get back, get back

Get back to where you once belonged

Oh yeah

Adaptiert von „Get Back“ (Paul McCartney)

14

Gartezwerg

Ich han en Gartezwerg umbracht

Han em de Chopf abgeschlage

Er hät mi immer nur blöd aagrinst

Und mer nie grüezi gseit, de Cheib

Dummerwiis isch Vollmond gsii

Sie händ mi gseh und verwütscht

Zur Straf hock-i jetzt im Schrebergarte

Siibe Jahr bi Wasser und Salat

Oh Cervalat, oh Cervalat

Wie vill Chohle müemer no durelah

Wie vill Füür müend no bränne

Wie vill Jogger gsehn-i no ränne

Bis i nüme muess warte

Da im Schrebergarte

Schneeglöggli im Januar

De still Has hät sie gfrässe

Er isch läufig, ja so läufig

Und mich bewacht de Rasemäher

Han mit em Has en Biotta trunke

Und em vom Gartezwerg verzellt

Gscheht em rächt, hät er gseit

De Chaib hät d Oschtereier klaut

Oh blindi Chue, oh blindi Chue

Wie lang luegsch eius no zue

Wie vill Milch mues no flüsse

Wie vill Chopfsalat mues i no güsse

Bis i nüme muess warte

Da im Schrebergarte

De Salat fangt a wachse

D Uhr hät ihri Zeiger broche

Aber laufe tuet sie gliich

S Fänschter isch offe, Ziit zum gah

400 Meter über em Meer

Staht am Bahnhof gschriibe

Das sött-i scho schaffe

Mit mine Schwümmflügeli

15

Gody

De Gody isch en Bürogummi

Gümmelet tagii, taguus

Ganz gründlich sis Läbe uus

Sis Glück hät uf eme Konto Platz

Monät für Monät e paar Lappe Lohn

Hey Gody, bisch en grosse Clown

Go, go Gody – Gody gang uf-s Ganze

Go, go Gody – lah dis Läbe tanze

Doch dänn a so-me Gummitag

Gümmelet de Gody wie en Stier

Es grosses Loch is Büropapier

Det inne fallt er tüüf und tüüfer

Sin Bürostuehl trüllt sich im Chreis

Em Gody wird-s chalt und heiss

Er riist sich d Kravatte vom Hals

Nimmt sie und fesslet sin Boss

Und knackt dänn no-s Tresorschloss

Bevor er us em Büro rännt

Macht er vo sim Gsicht e Farbkopie

Schriibt druff: Das isch de Gody gsii

Gopffriedstutz, schreit de Boss

De Gody isch mit em Stutz abghaue

Und tuet euis so d Bilanz versaue

De Gody hät scho de Siebner gnoo

De bringt en zu de Endstation

Det chauft er sich en Luftballon

De Gody hät de Uufstieg gschafft

Gseht euis schuffte us de Vogelschau

Oh Gody, am liebschte chömmt-i au

Ja, er isch jetzt ganz wiit obe

Det macht er sis Läbe lang blau

Oh Gody, am liebschte chömmt-i au

16

Golfstrom

Irgendwänn chunnsch nüme z spaht

Oder gahsch en Momänt z früeh

Uf eimal passed d Scherbe zäme

Und du weisch, du bisch aachoo

Villicht wachsch dänn am Morge uuf

Ällei, aber-s Glück näbed dir

Und bisch zum erschte Mal de

Wo-d immer im Spiegel gsehsch

Irgendwänn

Staht-s Läbe vor dir

Seit, hey du

Chomm eifach mit

Wo-s duregaht, das weiss-i scho

Irgendwänn laufsch nümm devoo

Eifach a so-me Mäntigaabig

Landisch endlich uf de Erde

Häsch en Golfstrom i dir ine

Und-s Iis fangt a schmelze

Villicht malt sie dänn

Es Herz uf de Stubebode

Mit em Finger und em Tee

Wo-d uusgleert häsch

Irgendwänn…

Irgendwänn isch dänn alles

Wieder a sim richtige Platz

Wie uf ere Modällisebahn

S Läbe isch e Chindergschicht

Villicht nimmt sie dänn dini Hand

Uf ihrem Chuchitisch

Und seit, chomm mer lueged

Wer vo euis de stärcher isch

Irgendwänn…

17

Im Chreis

Uf de Wält da häts e Stadt

I de Stadt da häts e Bank

I de Bank da häts en Tresor

Im Tresor da häts Gäld

Und Gäld regiert d Wält

Uf de Wält da häts e Stadt

I de Stadt da häts e Bank

I de Bank da häts en Tresor

Im Tresor da häts Gäld

Und Gäld regiert d Wält

Tanz mit mir im Chreis

Bis i nüt meh und alles weiss

Tanz so schnäll s nur gaht

Und de Chreis äntli laht

Uf de Wält da gits en Maa

De Maa de hät es Herz

I Herz da häts es Loch

I Loch da liitt en Brief

Und im Brief da staht

Uf de Wält da gits en Maa

De Maa de hät es Herz

I dem Herz da häts es Loch

I dem Loch da liitt en Brief

Und i dem Brief da staht

Tanz mit mir im Chreis…

18

Lah sie gah

Häsch i dim Chopf

Immer en Fluchtwäg gah

De hät sie entdeckt

Und grad sälber gnoh

Gläbt hän-der scho lang

Us de Tüüfchüehltrueh

Die Gschiider isch gange

Und du Esel bliibsch stah

Zweimal e halbi Liebi

Git no lang kei ganzi

Lah sie gah, lah sie gah

Chasch öppis Bessers haa

Häsch es ja so welle

Seit e Stimm i dir

Chomm äntli mal aa

Bis det, wo-d grad bisch

Wänn-d gahsch go bade

Wirsch halt nass däbii

De Name vo dem Spiil

Heisst „Alles oder nüt“

Zweimal e halbi Liebi…

Chomm, gibs doch zue

Am meischte häsch Müeh

Dass de Winterschlaaf

Jetzt so chalt wird sii

Gahsch go flippere

Es neuis Game fangt aa

S rüttlet und schüttled

Liechter lached di aa


Furt isch furt

Weg isch weg

Verlüür kei Gfühl

Wo-d gar nie häsch gha


19

Last Minute

Ich han sibe Uhre – aber ich han nie Ziit

Han en Time-Manager – aber ich han nie Ziit

Ich fahr en Turbo – aber ich han nie Ziit

Seckle jede Tag – aber ich han nie Ziit

Uhr, Uhr, mon amour

Quelle heure est-il, mon amour

Uhr, Uhr, mon amour

Quelle heure est-il, mon amour

You’ve lost your last minute

Rest in pieces, rest in pieces

Ich friss nur Fastfood – aber ich han nie Ziit

Han ein Giga-PC – aber ich han nie Ziit

Ich mach nie Pause – aber ich han nie Ziit

Bin immer zerscht fertig – aber ich han nie Ziit

Uhr, Uhr, mon amour…

Heure, heure, pas heureux, pas heureux

Ich känne alli Tricks – aber ich han nie Ziit

Bin immer erreichbar – aber ich han nie Ziit

Ich mach d Nacht zum Tag – aber ich han nie Ziit

Bin en Highspeed-Lover – aber ich han nie Ziit

Uhr, Uhr, mon amour…

Beim nächsten Ton ist es genau

20

Mängmal

Mängmal weiss ich

Dass d Sunne im Oschte uufgaht

Und eis und eis zwei git

Und nöd öppe drüü

Mängmal muess-i i de Berge

Nöd as Meer dänke

Und a de falsche Stell

Und a de falsche Stell nöd luut lache

Ich nimm s, wie s chunnt

Und wie s grad gaht

Ich nimm s, wie s chunnt

Und wie s grad gaht

Bin für alles parat

Mängmal chann-i Wasser

Vo Champagner unterscheide

Und chann mis Hämp

Uf Aahieb richtig chnöpfe

Mängmal schaff-i s

E paar Wörter zämezbringe

Und en ganze Tag lang

Und en ganze Tag lang nöd a sii z dänke

Ich nimm s, wie s chunnt…

Mängmal isch s eifach

Uf em Randstei z balanciere

Und öpper z umarme

Wo das grad bruucht

Mängmal da gaht d Sunne

Doch im Weschte uuf

Und ich weiss alles

Und ich weiss alles, alles isch guet

Ich nimm s, wie s chunnt…

21

Muess emal gseit sii

Mer frässed wissi Chride

Aber das macht nöd satt

Betted euis uf Rose

Bis de Arsch nümm gspürsch

Fühlsch di wie de King

Wänn-d am Stammtisch regiersch

Meinsch, segsch de Hirsch

An Jäger, a de dänksch nöd

Wänn du dir Ziit nimmsch

Git mer dir de Schueh

Und wänn-d z schnell bisch

Stellt mer dir grad-s Bei

Mer mached d Fuuscht

Im Gäldsack inne

Säged, ja warum nöd

Au zum gröschte Quatsch

Mer wüssed genau

Was schlächt isch und rächt

Poliered die Schine

Wo-s druff rollt und rollt

Wänn du dir Ziit nimmsch…

22

Mystery Woman

Ich bin nie ällei im Bett

Aber jetzt dreih mi um

Luege gäge d Wand

Und träuime vo dir

Es isch wieder so wiit

Atom spaltet sich i mir

Fanged a chreise

Sueched de Wäg zu dir

Mystery Woman

Bisch so nöch und so fern

Wie am Aabig

De Morgestern

Ich schick mini Träuim

Uf e Umlaufbahn

Rund um dich umme

Bis mers schwindlig wird

Hey, Mystery Woman

Ich glaub ja a Wunder

Aber für en Luftsprung

Bruuch-i en feschte Bode

Mystery Woman…

Es isch wieder so wiit

Atom spaltet sich i mir

Fanged a chreise

Sueched de Wäg zu dir

Us de Gletscherspalte

Wird en Golfstrom

Und us em Stummfilm

Wird es Musical

Mystery Woman…

23

Narreschiff

S Narreschiff fahrt dur d Nacht

Alles tanzt und lacht

Mer lönd d Korke la knalle

Und hocked fescht i de Falle

Hey, hey, uf em obere Deck

Wäm-mer nüüt wüsse vo dem Leck

Aber allne isch klar

Was de Kapitän seit, isch nöd wahr

Narreschiff, mer sind so stolz

Uf dini Fahne am Holz

Mer folget ihre blind

Bis mer undergange sind

Hey, hey, uf em obere Deck…

Ihr Ratte, losed genau

Ihr dänked, ihr seged schlau

Aber wänn s Schiff zerschellt

Sind au eui Stunde zählt

Hey, hey, uf em obere Deck…

24

Novämerbahnhof

De Manor hät heilige Aabigverchauf

D Stromsterne mached de Himmel ganz blind

Uf em Perron vis-à-vis täubelet s Chrischtchind

Züüg chömmed und gönnd und känne nimmt mi mit

Statt schneie tuets schiffe und chalt isch es gliich

Es Plakat verspricht s Paradies, alles inklusive

En Baum macht sich mitte im Beton ganz stiif


Am Bancomat staht eine und verchauft sini Ziit

De Alt mit de Papiersäck reist nümme wiit

En Chauffeur hockt im Bus und meint, er säg de King


Eine isch nöd ganz hundert und bällt wie en Hund

Ich plan en Komplott und verschieb en uf morn

En Luutsprächer tönt wie es Schiffshorn


Us de Underfüehrig

Ghör-i e Melodie

E Handorgle spielt sie

Steckt nomal de ganz Summer drii

Det unne, ja det

Chönnt-i überwintere


25

Nur no eimal

Ich bin zwüsched Stüehel und Bänk

Oder besser gseit zwei Bett abe gheit

Han vo A bis Z alles welle

Aber nur mis Herz chönne geh

Wott di nur no eimal gseh

Dänn nomal und no einmal meh

Au wänns nach jedem Mal

Meh und meh wird weh tue

Abhebe han-i easy chönne

Aber d Landig isch i-d Büsch

Jetzt stahn-i verchehrt im Fäld

Zwüsched da und weiss nöd wo

Wott di nur no eimal gseh…

Soy un tiburón con mucho corazon

No se ve como lloro por mi tesoro

Soy un tiburón con mucho corazon

Me voy a Vera Cruz cantando el Blues

Alles, was mer gmacht händ zäme

Isch-s erscht und-s letscht Mal gsii

Nach de Sterne häm-mer griffe

Obwohl mer-s doch nur aaluege cha

Wott di nur no eimal gseh…

26

Offside im Schilf

Bin scho mängisch uf-d Wält choo

D Nabelschnur um de Hals

Stahne immer irgendwo

Im Offside und im Schilf

Ich troue mir

Ich troue mir

Ich troue mir – nöd über de Wäg

Hüt chann-i alles geh

Und morn wieder wegneh

Du findsch mi nie det

Wo-d mi zletscht häsch gseh

Ich troue mir…

Mache ständig grossi Schritt

Chume trotzdem nienäts aa

D Regle, die känn-i nöd

Spile aber immer mit

Ich troue mir…

Ich gsehne höchi Berge

Und dänk debii as Meer

Säge Ja und meine Nei

Und spile sälte fair

Ich troue mir

Ich troue mir

Ich troue mir – alles zue

27

Oh Blues

Han scho alles probiert

Chume überall druus

Han scho alles probiert

Chume überall druus

Isch das scho alles gsii?

Blues Oh Blues Oh Blues

Dreih mi im Chreis und Chreis

Wott aber lieber graduus

Dreih mi im Chreis und Chreis

Wott aber lieber graduus



Mached mer alli Knoche weh

Bliibe am liebschte im Huus

Mached mer alli Knoche weh

Bliibe am liebschte im Huus



Träuime vom e warme Buuch

Macht mi ganz konfus

Träuime vom e warme Buuch

Macht mi ganz konfus



Han alles, was mer gfallt

Wohne im e Warehuus

Han alles, was mer gfallt

Wohne im e Warehuus



Bin immer am ränne

Mal als Chatz, mal als Muus

Bin immer am ränne

Mal als Chatz, mal als Muus



28

Ojemine

Oh yeah, ojemine häsch die scho gseh


Sie spieled de Blues und chönnd nöd meh

Eis und eis isch zwei und eis isch drüü

Drüü Akkörd – meh bruchsch doch nöd


Sie chönnd-s nöd lah mit füfzgi und meh

Oh yeah, ojemine häsch die scho gseh…

Eis und eis isch zwei und eis isch drüü

Drüü Akkörd – meh bruchsch doch nöd


Wenn-s spielet, fallt im Summer Schnee

Oh yeah, ojemine häsch die scho gseh…

29

Pendler-Blues

Ich gah zum Bahnhof, am Morge früeh

Das macht und macht mer ganz schön Müeh

S isch nöd New Orleans, nei Andelfinge

Und immer muess-i hetze und springe

Genau drum, chunnsch druus

Drum han-i de Pendler-Blues

Genau drum, chunnsch druus

Drum han-i min Pendler-Blues

Wiit und breit kän Mensch, endlosi Prärie

En Traum, denn ich schwitze zwüsche Menschevieh

De Zug bringt mi Tag für Tag uf Brugg

Am Morge hii und am Aabig zrugg

Genau drum, chunnsch druus…

Geschter, da fahrt de Zug z Brugg verbii

Vergisst z halte – en Huuch vo Prärie

Fahrt und fahrt und fahrt – eifach graduus

Und d Räder schlönd im Takt vom Blues

Käs Gmoscht, käs Gehetz – was wott-i meh?

Aber plötzlich stosst mi öpper, seit „hee!“

Ich wache uf, das dörfs doch nöd geh

De Kondukteur wott mis Billett gseh

Genau drum, chunnsch druus…

30

Quinn de Eskimo

Alli wänd hoch use

Baued Hüser in Himmel

Stiiged uf höchi Berge

Schicked Rakete is All

Aber Quinn de Eskimo

Die lacht und seit nur:

Gumped doch eifach

Vor Freuid hoch i d Luft

Jetzt isch sie choo

Jetzt isch sie da

Ja, es isch sie

Quinn de Eskimo

Ich han ja au mini Fehler

Und schaff s mängisch nöd

Öpper z umarme

Wo das grad bruucht

Au mit eme Rägeschirm

Chann-i nüt aafange

Aber wänn sie dänn chunnt

Isch de Himmel blau und bunt

Jetzt isch sie choo…

Ich laufe gern näbed dir

Im Schritt vo dir, Prinzässin

Und bisch emal weg

Vermiss ich dich sehr

Viles macht mi truurig

Tuube füettere tuet mer guet

Aber wänn sie dänn chunnt

Flüged alli uf sie zue

Jetzt isch sie choo…

Adaptiert von „Quinn the Eskimo“ (Bob Dylan)

31

Rocksong

D Schiiwerfer sind aagange

Und d Bänd isch uf d Bühni choo

Scho vom erschte Ton aa

Händ s alles geh, was si chönd

Du bisch näbed mir gstande

De Funke isch grad gsprunge

Und d Musig isch so luut gsii

Mer händ euis nur no chöne hebe

Es isch en Rocksong gsii

Wo mer euis s gspüürt händ

Es isch en Rocksong gsi

Wo mer euis s küsst händ

Es hät e paar Zuegabe geh

Nöd nur vo de Band, oh nei

Mer händ no es Bier trunke

Und jede isch siin Wäg gange

Immer wänn-i de Song gehöre

Dänn muess ich a dich dänke

Ich han dich sither nie meh gseh

Aber d Gitarre spieled immer no

Es isch en Rocksong gsii…

Es isch kän Blues gsii, au kän Hiphop oder en Ländler

oder en Schlager, au kän Samba oder en Weiss-nöd-Was,

es isch en Rocksong gsii

Es isch en Rocksong gsii…

32

Schaafhalter-Value

Ich bin en Schaafhalter

Hüete s Schaafhalter-Value

Miini Aktie sind am Stiige

Und für-d Büetzer git-s Ohrfiige

Hüt wott-i dini Wulle

Morn d Milch und-s Fleisch

Bis flexibel, dänk global

D Sorge lokal sind egal

Schaafhalter-Value, Schaafhalter-Value

S Geld muess schaffe und nöd du

Schaafhalter-Value, Schaafhalter-Value

S Geld muess schaffe und nöd du

Wenn eine gwünnt und gwünnt

Müend viil anderi verlüüre

Das Gsetz isch Kapital

Und du merksch es nöd emal

Schriib-i dänn rooti Zahle

Gaht-s uf-d Schlachtbank mit dir

Schaaf, was söll dis Gschrei

Du wählsch ja sälber d Metzgerpartei

Schaafhalter-Value…

Meeh, meeh und meeh

Und immer meeh und meeh

Rändite ränn, Rändite ums Läbe

33

Schiff ahoi

Simmer obe oder une

Hämmer verlore oder gunne

Mümmer stosse oder zieh

Isch es hüt oder nie

Simmer riich oder arm

Hämmer chalt oder warm

Isch es falsch oder richtig

Simmer nüt oder wichtig

Isch es bös oder guet

Hämmer Angscht oder Muet

Simmer gfunde oder verlore

Lönd s di laufe oder schmore

Simmer chrank oder gsund

Hät nüt oder alles en Grund

Chunsch druus oder gheisch drii

Teilsch uus oder stecksch ii

Aber hüt isch das egal

Mer singed hundertmal

Hüt hämmer Glück wie Heu

Leine loos und Schiff ahoi

Wämmer choo oder gah

Simmer Frau oder Maa

Isch es dumm oder schlau

En Adler oder Kabeljau

Hämmer Glück oder Päch

Simmer brav oder fräch

Säged mer ja oder nei

Glaubsch as Huen oder s Ei

Simmer dick oder dünn

Git s Verluscht oder Gwünn

Gaht s euis guet oder schlächt

Simmer König oder Knächt

Ziehsch di uus oder aa

Tuesch schwüme oder stah

Isch es gschiid oder blöd

Häsch mi gern oder nöd

Aber hüt isch das egal…

Gunne – verlore – gunne – verlore

Gunne und wieder verlore

Gunne – verlore – gunne – verlore

Gunne und wieder verlore

Angscht – Angscht – Muet – Muet

Bös – bös – guet – guet

Schwüme – schwüme – stah – stah

Und dänn wieder vo Aafang aa


Kännsch de Ort, wo s Fisch rägnet

Weisch, wo de Bumerang umkehrt

Kännsch de Ort, wo s Fisch rägnet

Weisch, wo de Bumerang umkehrt


34

Scho alles gsii?

E Handvoll Sternstunde

Nach e paar Gläser Wii

Wo für es paar Momänt

Alles möglich wär gsii

E paar Tön, e Melodie

D Aafang häsch scho ghaa

Es hett chöne din Song sii

Häsch en aber lige lah

Isch das dänn scho alles gsii

Wiit usse und tüüf ine

Da muess doch no öppis sii

Isch das dänn scho alles gsii

Weiss nöd, was es wär

Aber das würd-i gern sii

Ab und zue am Morge früeh

Wo-d grad uufgewachd bisch

Häsch gwüsst, wie alles gaht

Aber nur bis zum Zmorgetisch

Ja und emal en Buuch

Schön warm und weich

Hättsch chöne tüüfer gah

Aber de Muet hät di verlah

Us so mängem Traum

Bisch z Nacht uufgwacht

Aber am helle Tag

Häsch das nie gmacht

Nie es richtigs Problem

Wo di wiiterbracht hät

Nur vill Chlöne und Stöhne

Eigentlich no ganz nett

Und emal e ganzi Liebi

Nöd zweimal e halbi, vill meh

Es Gschänk, eifach eso

Häscht s nur müesse aaneh

Isch das dänn scho alles gsii…

35

Schwöschter vom Mond

Hey Martina, umarm mi nomal

Mit dine Ärm no wiis vom Winter

Es isch scho Mai und de Summer chunnt bald

Hey, du bisch d Schwöschter vom Mond

Dis Liecht isch so hell und raubt mer de Schlaf

Mit offne Auge träum-i vo dir

36

S Füür im Herz

Es git nüt, wo so starch isch

Wie die Chraft vo dim Herz

Sie isch so fiin wie en Huuch

Und versetzt en ganze Berg

Letschti bin-i am Morge früeh

A de Limmat nah go laufe

Han suscht nöd gwüsst wohii

Da seit plötzlich e Stimm zu mir

En Grossbrand chasch lösche

Aber nöd s Füür, wo i dim Herz brännt

En Fluss laht sich staue

Aber nöd de Golfstrom, wo sin Wäg kännt

Ragete flüüged zu de Sterne

Mer studiered Tag und Nacht

Gönd go bäte, gönd go biichte

Und tanzed ums goldige Chalb

Aber nüt isch so starch




Es isch egal, wer du bisch

Egal, was schief gloffe isch

Eimal, da gspürsch au du

Wie s Iis aafangt schmelze

En Grossbrand chasch lösche…

Es git nüt, wo so starch isch




Geschrieben für www.badenzeigtherz.ch

37

Truurigi Strass

Ich stahn uf ere Strass

Ihre Name isch Oktober

Han e Adrässe i de Hand

Wo da kän Mänsch kännt

Hinder dem Baum det

Versteckt sich en Schatte

Er chunnt vo me Sunnestrahl

Wo de Summer vergässe hät

Das isch en Lovesong

Ich leg-en in es Füür

Villicht chunnt ja d Wärmi

Bis zu dinere Tüür

Jetzt rächt sich de Oktober

Für d Blueme vom Summer

Wo mer euis gschänkt händ

Sie sind im Näbel verschwunde

Es Blatt bewegt sich im Wind

Wie mis Herz, wänn din Name fallt

Was weiss ächt de Baum

Vom Früehling, wo wieder chunnt

Das isch en Lovesong…

Ich han lang e Melodie

Tüüf i mir versteckt ghaa

Bis du choo bisch und

Sie mir gsunge häsch

D Erinnerig isch es Echo

Es verhallt uf de Strass

Wo mer zäme tanzt händ

Zum Lied vo euisem Stern

Das isch en Lovesong…

38

Uf em Wäg zu dir

Ich wott alles hinder mir lah

Und nur no zum Bahnhof gah

Es isch kei Frag, ich fahre hii zu dir

Ich weiss, d Fahrt wird lang sii

Vill Gschichte lahn-i zrugg debii

Es git nur ein Wäg und de führt zu dir

Ich fahr eme neuie Tag entgäge

Hinder mir vill Wolke und Räge

Mis Herz schlaat im Takt vo de Räder

Du und ich sind fürenand gmacht

Sind truurig gsii und händ vill glacht


Eimal hii und nie meh zrugg

Ich bin uf em Wäg zu dir

Eimal hii und nie meh zrugg

Ich bin uf em Wäg zu mir

Fälder und Hüüser ziehnd verbii

Alles isch a sim richtige Platz

Und scho bald fahr-i im Bahnhof ii

Für mich zählt jetzt nur no eis

De Zug biibt fescht uf sim Gleis


Eimal hii und nie meh zrugg…

39

Upside Down

En Priis gits au ohni Fliis

Nach A muesch nüt meh säge

Wer raschted, de chunnt wiiter

D Mittel sind heiliger als de Zwäck

Wo en Wille isch, isch e Wand

Vo de Arme lernt mer spare

Me isst heisser als kocht wird

Vo nüt chan alles choo

Dance me upside down

Bis-i nüt meh und alles weiss

Dance me inside out

Bis-i nüt meh und alles weiss

Alles Guete chunnt vo une

Lüge händ oft langi Bei

Us de Auge, voll im Sinn

Guet Ding chan schnäll gah

Stete Tropfe schliisd de Stei

Rach isch bitter

Hunger chunnt vo nüt Ässe

Träuim sind hochi Bäuim

Dance me upside down…

Schadefreuid isch kei Freuid

Ei Hand macht die ander dräckig

Chunnt Ziit – scho z spaht

Wie du mir, so du dir

Vom Guete gits z wenig

Bäum wachsed in Himmel

Liebe macht der d Auge uuf

S Herz chasch nie verlüüre

Dance me upside down…

Endi guet, Rescht am Arsch

40

Volksguet

Und Herremeitli git’s ja nit

Wo keini Fähler händ

Drum sing-i jetzt de Rock’n‘Roll

So hät min Fruscht es Änd

Drum sing-i jetzt de Rock’n‘Roll

So hät min Fruscht es Änd

Det äne am Bergli, det fahrt en Subaru

Er fahrt über d Geiss und die macht nur no muh

Wänn-i nume wüsst, wer de Vogel da obe wär

De Vogel, de macht mer s Läbe schwer

Wänn-i nume wüsst, wer im Oberstübli wär

De Voge da obe macht mer s Läbe schwer

Ja s Oberland, miis Oberland

Miis Oberland isch nüme schön

Ja s Oberland, miis Oberland

Das fahrt mi no a d Wand

Alles gheit drii, alles gheit drii

Drii gheit die ganzi Nation

Alles gheit drii, alles gheit drii

D Mamme, de Pappe, de Sohn

Es git halt nüt Schöners juhe, juhe

Als s Sünneli vo de SVP

Es git halt nüt Schöners juhe, juhe

Als s Sünneli vo de SVP

41

Warum no singe?

Du frögsch mi, warum no singe

Bi so viel Lärm und falsche Tön

Warum no singe, wenn alli schwätzed

S Läbe stumm isch wie en Fisch

Du muesch singe für die Sänger

Wo ihri Stimm verlore händ

Und muesch singe für die Lover

Wo nur s eige Herz ghöred schlaa

Du muesch singe für die Chinde

Wo en blinde Schutzängel händ

Und muesch singe für die Häxe

Wo mit em Bäse nur putze müend

He du da obe, wenn du no da bisch

Muesch au du mit euis singe

Denn es dörf doch nöd passiere

Dass euises Lied zu Staub zerfallt

Du muesch singe für de Clown

Wo mer nume uuslache tuet

Und muesch singe für die Böim

Wo nümm in Himmel wachse chönnd

Du muesch singe für die Bäre

Wo im Zirkus tanze müend

Und muesch singe für d Matrose

Wo z Andelfinge gschrandet sind

42

Wo gahsch hii?

Säg, wo gahsch hii, wänn-d Musig spillt

Säg, wo gahsch hii, wo gahsch hii

Säg, wo gahsch hii, wänn alli tanzed


Bisch debii oder laufsch devoo


Du bisch scho wiit gange

Oder häsch di triibe lah

Vo de Liebe kännsch

De erscht und letscht Blick

Nach A seisch nümme B

Büügsch lieber emal ab

Ob Züri oder Basel günnt

Das isch der pfifegliich

Immer meh und meh vom Gliiche

Das git no lang nüt Neuis

De Ball liit uf em Penaltypunkt

Dini Chatz chunnt nümme hei

Stahsch ohni Chleider vor mir

D Chugle rollt, rien ne va plus

Alli drucked sich de Duume

Aber, hey du, ja du...

Säg, wo gahsch hii, wänn-d Musig spillt…

Wottsch kei Wältreis günne

Nöd mit Superpünkt punkte

Landisch nach jedem Sturm

Immer uf beide Füess

Du backsch dis eigne Brot

Und singsch din eigne Song

Bruchsch käs Amen meh

Dämit weisch, wie s isch

Aber, hey du, ja du...

Säg, wo gahsch hii, wänn-d Musig spillt…

Documents

Songtexte von Stefan Meier - HaddockDu nach Oschte Und ich nach Weschte Du muesch kei Angscht ha ... Du seisch, das isch nöd recht Aber d Wält, die dreiht sich gliich Und de Nabel,